هشام جمال يكشف كواليس إلغاء حفل خطوبته على ليلى زاهر

في لحظة مليانة مشاعر إنسانية وموقف صعب، حكى الفنان والمنتج هشام جمال تفاصيل قرار إلغاء حفل خطوبته على الفنانة ليلى أحمد زاهر، بعد وفاة أربعة من المنتجين المقربين منه في حادث على طريق الضبعة، مؤكدًا إن الحادث حصل قبل الحدث بـ48 ساعة بس، وكان صدمة كبيرة بالنسباله.

هشام قال خلال لقائه في برنامج «صاحبة السعادة» مع الفنانة إسعاد يونس: «كنا مجهزين كل حاجة للخطوبة، المكان في الساحل، الفستان، الديكور، والمعازيم كمان، لكن أول ما عرفنا بخبر وفاة المنتجين الأربعة، ومنهم حسام شوقي اللي كان بالنسبالي زي أخويا، قلت لليلى لازم نلغي كل حاجة».

وأضاف:> «الموقف ده كشفلي قد إيه ليلى بنت أصل، أول ما قلتلها قالتلي فورًا كلم الناس وبلّغهم إننا هنلغي رغم إنها ما تعرفهمش معرفة شخصية، بس حسّت بوجعي».

وأكد هشام جمال إنه ما كانش قادر يحتفل في ظل الحزن الكبير اللي عاشه، وقال: «قلت لها مش هأجل أسبوع ولا شهر، أنا مش قادر أتبسط»، مشيرًا إلى إن الموقف ده زوّد الترابط بينه وبينها وخلاه يشوف معدنها الحقيقي.

من ناحيتها، قالت ليلى زاهر إنها عمرها ما هتنسى اللحظة اللي فاجئها فيها هشام يوم الفرح بأغنية «فستانك الأبيض» اللي أهداها ليها الفنان حسين الجسمي، ووصفتها بأنها «أحلى مفاجأة في حياتي».